Вось і наступілі доўгачаканыя летнія канікулы. Можна кожны дзень адпачываць, доўга гуляць на свежым паветры, загараць, хадзіць на экскурсіі, займацца заняткамі па інтарэсах: ляпіць і маляваць, вырэзваць і клеіць, спяваць і танцаваць, разглядаць кніжкі і слухаць казкі. Дзеці вельмі любяць, калі ім дарослыя расказваюць ці чытаюць казкі, заўсёды з радасцю чакаюць новых сустрэч з любімымі казачнымі героямі. Звяры, птушкі і людзі, якія жывуць у казках, абуджаюць у дзяцей дапытлівасць і цікавасць, спрыяюць развіццю звязнага маўлення, умення весці дыялог, пабуджаюць жаданне прымаць удзел у драматызацыях гэтых казак. Выхавальнікі разам з выхаванцамі падрыхтавалі і паказалі беларускую народную казку “Коцік, Пеўнік і Лісіца”. Дзеці-гледачы ўбачылі казачных герояў і падзеі, якія здарыліся з імі, перажывалі за іх і радаваліся, калі героі пасябравалі і сталі разам гуляць.